पुणे : भूगाव येथील फॉरेस्ट ट्रेल्स टाउनशिपमध्ये झालेल्या कथित अनियमितता, बेकायदेशीर बांधकामे आणि नियमभंगांबाबत रहिवाशांकडून गंभीर तक्रारी करण्यात आल्याचे समोर आले आहे. या प्रकल्पाचे प्रवर्तक परांजपे स्कीम कन्स्ट्रक्शन लिमिटेड यांनी विकासदरम्यान विविध नियमांचे उल्लंघन केल्याचे, करण्यात आलेल्या चौकशीतून उघड झाल्याचा रहिवाशांचा दावा आहे.
मिळालेल्या माहितीनुसार, पीएमआरडीएचे आयुक्त डॉ. योगेश म्हसे यांनी प्राप्त तक्रारींवर कार्यवाही करत तपास सुरू केला. या तपासांत सार्वजनिक सोयीसुविधांच्या जागांवर बांधकाम, खोटी प्रतिज्ञापत्रे, परवानगीतील अटींचे उल्लंघन यांसारख्या गोष्टी स्पष्ट झाल्याचे रहिवाशांचे म्हणणे आहे. आयुक्तांनी ६ ऑक्टोबर २०२५ रोजी प्रवर्तकांना अनियमितता सुधारण्यासाठी विशिष्ट मुदत देणारा आदेश जारी केला. मात्र, त्या निर्देशांचे पालन करण्यात प्रकल्प प्रवर्तकांकडून दुर्लक्ष होत असल्याचा आरोप करण्यात आला आहे.
एसटीपी २००५ अधिसूचना, तसेच नंतरच्या आयटीपी २०१९ मधील तरतुदींशी संबंधित नियमभंगांच्या तक्रारीदेखील नोंदवण्यात आल्या आहेत. सार्वजनिक उद्याने व खेळाची मैदाने म्हणून राखीव ३५ एकर जागेवर बांधकामांना allegedly परवानगी देण्यात आली असून, त्यामुळे निरपराध घरखरेदीदारांची दिशाभूल होत असल्याचे रहिवाशांचे मत आहे.
तसेच, २०१९ मध्ये पीपीने उभारलेल्या अनधिकृत बांधकामांना सक्तीचे कंपाऊंडिंग शुल्क न आकारता नियमित करण्यात आल्याबाबतही प्रश्नचिन्ह उपस्थित करण्यात आले आहे.
या सर्व बाबींवर तातडीची पावले उचलावीत, तसेच टाउनशिपमधील सुरू असलेली बेकायदेशीर कामे तत्काळ थांबवावीत, अशी मागणी रहिवाशांनी केली आहे. दरम्यान, संबंधित मुद्द्यांचा आढावा घेण्यासाठी फाइल शहरी विकास विभागाकडे पाठवण्यात आल्याची माहिती मिळते. रहिवाशांनी आता उच्चस्तरीय समितीकडून पुढील कारवाईची अपेक्षा व्यक्त केली आहे.
